Welonek

Ojgyn z Pnioków

No, toż momy podzim na karku. Cześnie, amplary, johanki, kobylonki i inksze ołbsty zawarzone, łogorki i żołcioki (bo inkszych grzibow latoś za tela niy boło) we łoccie zaprawione, we korbflaszach eźli dymionkach wino poleku geruje, pieczki na gody zrychtowane i razinku ino przed świyntom jadwiszkom jesce jakosik szykowno faska kapusty trza udeptać i forant na zima momy zbyte.
Wszyjsko to gryfnie i fajniście, nale jo mom teli jankor i decko sie tropia. Szkryflom Wom roztomajte wice, bery i gupoty – a możno i niy ino gupoty – bo mocka sie u nos – i to niy ino na Pniokach – dzieje, chocia niy wszyjsko do Wos roztomili ludkowie trefio. Jo tam dyciś miarkuja, iże terozki roztomajte redachtory robiom srogi szpagat, coby wszyjskim dogodzić skuli welonku i łobiyranio rajcow, prezidyntow i landratow. Bogać tam, niy byda przecamć sam durch wynokwioł, bo tyż miarkuja, iże na chwolba i snochwianie tych dupnych miyjskich „politykerow” tyż dyć trza decko placu we cajtongach (łoni za to bulom trocha betkow). Bo ino kuknijcie. Jedyn wtyko swoja fresa na cołko szkartka, inkszy zasik machluje podle powiadaczki: lepszij łycko, nale wdycko. Dejcie pozor, iże jo to kryklom przodzij niźli bydymy welować, chocia niy poradza spokopić, kiej i cy to do Wos trefi ???
Ludzie, a jake roztomajte wicne lebo łoszydne fresy i jake iptowate, fimlowate perzołny pokazujom sie we tyj telewizyji, abo fandzolom we radijoku. A jedyn drugimu bajnsztele podkłodo i świto po szinkbajnach, a kierymu to za gryfnie niy wyłamzi, to chocia poforsko coby ino inkszygo łoszeredzić a samymu niy dać sie łod grotka łodchlastnońć.
A nojlepszij to wszyjsko wyeklerowoł we telewizyji tyn kiejsik Ślonzok a terozki dzioboł wiy fto, synator Kutz:
– Idziemy wspólnie, to nikt nikogo niy ciulnie (!).
Tak pedzioł. Pra, iże gryfnie ?
No, i kiej sie tak cowiek na to wszyjsko gawcy, to ci sie spomino jak te nasze starki jużcić wdycki godali:
„Niy doł Ponboczek świni rogow, bo by jesce bodła”.
I hledocie jesce kaj je gupota? Za gupotom niy trza sznupać. Łona ci je naobkoło.
Mieli my już roztomajte welonki. A tak po prowdzie joch tam niy je telki angyjber i na polityce sie możno niy znom, chocia bocza jak moj umrzity Łojciec sztyjc mi tuplikowoł:
– Dej sie Ojgyn pokoj ze politykom, bo to jes richtik srogi konsztik, coby łyknońć rapitołza (żaba) abo gonsiora, a ku tymu niy wykrziwić pychola ino udować, iże to boł jakisik szykowny maszkyt. Niy kożdy to poradzi łobstoć.