Ślonzoki sie bantujom

Ojgyn z Pnioków

Ze przileżitości wypraskniyńcio trzecigo Powstanio Ślonskigo dziennikarz naszego tygodnika „Gońca Górnośląskiego” nawiedzioł chnet stuletnigo Bonifacego Sliwy, wywołanygo sam u nos powstańca i działacza ślonskigo..
– Panie Sliwa, byliście przi pierszym powstaniu. Jak do tego dolazło i jaki to miało fajrant ?
– Ja toć. Piyrsze powstanie to boło tak. Powyciongali my wszyjske stare pistołle ze chlywikow, kaj łone byli poskludzane jesce łod piyrszyj wojny. Trefioło nos sie poruch i pedzieli my sie, co pudymy na tyn Anaberg. Ale te gizdy Miymce sie zwiedzieli i już ci tam na nos cichtowali ze gywerami.
– No i co boło dalszij – pyta dociyrny żurnalista.
– Ano, kiej my sie już przikwanckali do tego Anabergu, to Miymcy gruchli ze tych gywerow a my ..... pitli.
– No, dobra. To boło piyrsze powstanie. A jak boło we tym drugim ?
– Tak jakosik za rok juzaś my sie spichli, nale już terozki to my sie lajstli pora gywerow telkich nikiej mieli przodzij Miymce i zasik lyjzymu na tyn Anaberg.
– I co boło dalszij, co boło dalszij ?
– Miymce sie zwiedzieli, kiela momy tych gywerow, narychtowali ci sie sam pora gryfnych kanonow i na nos już wachowali. I kiej my ino znojdli sie przi tym Anabergu to łoni gruchli a my .... zasik pitli !
– Hmm, no, a dyć toż jak tyż ci boło ze tym trzecim powstaniym, panie Bonuś ?
– No, zasik na bezrok trefiyli my sie wele chlywikow łod staryj Majzlinyj nale beztoż, iże my dostali dwa razy po rzici, to terozki byli my barzij monter i łod jednygo Żyda sprawiyli my sie trzi take kanony choby Miymce. No i do kupy kwanckomy sie na tyn Anaberg nikiej łonskigo roka.
– Byliście teraz lepszij uzbrojone to i cołkie powstanie musiało tyż przeca iankszij wyglondać, pra? – pyto sie tyn dociyrny żurnalista dalszij.
– A dyć, iże inakszij. Kiej my już przismycyli te nasze kanony pod Anaberg, gawcymy sie a Miymcy na doczkaniu przikludziyli tako festelnie dupno kanona, kiero sie „rubo Berta” mianowała i łoni jesce niy gruchli .... a my już .... pitli!!!
I tak to boło z tymi naszymi powstanioma podug Bonusia Śliwy.