Setaaaa ...

Ojgyn z Pnioków

Latoś to mieli my jakiesik pofyrtane te latowe miesionce. Jak roz ci boło blank gryfnie, to zarozki na drugi abo trzeci dziyn siompi dysc i robioła sie chlapaka. Nic, ino sie łożrić, ścioprać we szynku (bo w doma staro gawcy i przezywo na kożdo achtla, cyjntla lebo halbecka). Jo tak ciyngiym szkryflom ło gorzole na paskuda naszymu Kapelonkowi ze Jozefki, kiery niy ciyrpi tyj łopary i machmola, i sztyjc ze ambony tuplikuke, iże to je łostuda, grzych i skoranie boskie. A przeca już ci we biblijce je naszkryflane co som Ponboczek we Kanie Galilyjskij zwekslowoł woda na jabola. Przeca to znocie, pra?
Jo tyż mom rod i dobre piwo i lepszejszo gorzolka, a nojbarzij to mi sie zdo kiej lejza do naszego Pyjtra i poradza tam pora dobrych halbecek ze kamratoma łobalić.
No, a niyskorzij ??? Niyskorzij to je kacynjamer, szmerckopf i jak ci to kiejsi śpiywoł Wiesiek Golas (he, he, he, wyloz śniego „golas” chocia łon zawdy boł szykownie łoblecony) : „tompanie biolych mew”. Znacy sie srogi kac.
A na kaca ? Na kaca to nojlepszy je klin. I jak to godajom: seta z rana, lepszejszo niźli zana.
Wysłepiesz chopie seta i inkszy cowiek we ciebie wlazuje. Wlazuje i ... tyż mu sie chce słepać. No, toż chlist w tyn gupi pysk. I tyn inkszy cowiek, kiery we cia chopie wloz ... przismycoł ze sia kamratow, kierym tyż sie kce słepać. A ze rańca, a rano? A rano zasik usmolony dziyn i zasik seta i nowy cowiek wlazuje we cia .... chrrr, chrrrr, chrrrrrrr .......