Ryklama piwa

Ojgyn z Pnioków

Tak po prowdzie to sie ino staro Jondercyno raduje. Jeji pies sie ciyngiym gawcy we telewizyjor i beztoż durch słepie piwo. Pewnikiym terozki kiej niy uwidzi „tyskie ponad wszyskie” abo „po godzinach LECH” to na isto zacnie słepać woda abo mlyko. I tu mi sie spomnioł taki fal. U Pyjtra we knajpie spiyrali sie festnie Jołzel z Bercikiym, kiere piwo jes lepszejsze: jasne abo ćmawe? Na to wloz Hajnel i po jakisik kwilce pado:
– Dejcie mi pierony pokoj ze ćmawym piwym. Kiej jo ci we łoński pyndziałek wysłepoł dwanoście zajdli światłygo piwa, to mi nic niy boło. A kiej mie ino tyn dzioboł, tyn diosek pokusioł i wyduldołech na to śtyry szopy ćmawygo piwa, to zarozki żech napocznoł sfrocać i do rana żech sie rady niy wiedzioł !
I tak po mojymu, to zawdy jes lepsze piwo (możno i ze cyjntlom) niźli klachy mojij staryj ze somsiodkoma na siyni abo u Piontcynyj w magli. Ino, iże ze wszyskim trza mieć miara. Moja Elza – tak cum bajszpil – to nikandy niy wiy cy jo co wysłepoł podwiyl niy zacynom mojigo basztarda ucyć pić ze flaszki abo naszo kukowka ze buksioka niy uca śpiywać: „gorolu, cy ci niy żol”.
I tak wol niy wol, piwo ludzie na ryklamach niy bydom łoglondać, a .... zołwizoł je bydom słepać wiela ino wlejzie.