Papagaj i polityka..

Ojgyn z Pnioków

Papagaj i polityka.

Jedna baba miała ci w doma papagaja, kierego mianowała Acik, i kiery ciyngiym powtorzoł:
– Fort ze Kaczyńskimi ! Weg ze Kaczyńskimi !
Jakisik jedyn łoszkliwy somsiod naskargowoł u policajtow i hnedki klupiom na dźwiyrze policajty.
– Witomy gryfnie, sam policjo. Dostali my łobsztalowanie, iże wasz papagaj ubliżuje naszymu prezidyntowi o prymierowi. Pokażcie nom sam w te piynty tego ptoka !
Baba przismycyła klotka ze tym papagajym, a tyn ci już łod proga łozdiyro sie:
– Fort ze Kaczyńskimi ! Weg ze Kaczyńskimi !
Policajt dowo babie egzorta i godo:
– Jeźli bydzie tak tyn ptok łoździyroł sie dalszij, to bydymy musieli go zaciukać abo uśpić a wos wrajżymy do heresztu.
Baba, kiej ino policajty wylejźli, prosi tego łoszkliwego papagaja:
– Suchej ino Acik, Acicku, niy godej tak już wiyncyj, bo mie zawrzom a ciebie uśpiom, i na co nom ta łostuda.
Pora dni boło ruły no ale, papagaj sie spomnioł i juzaś napocznoł swoji:
– Fort ze Kaczyńskimi ! Weg ze Kaczyńskimi !
Na drugi dziyń baba dostała listecek, co mo sie stawić we gyrichcie i przismycyć ze sia tego papagaja na „dowod rzeczowy”. Baba zarozki zatyrała do kościoła i we suchatelnicy wszyjsko łopedziała farorzowi. A farożycek ji na to ganc ajfach :
– Suchej ino babo, jo mom tyż jednego papagaja, kiery godo i jes blank podany do twojigo. Do tego gyrichtu zwekslujymy jich i żodyn sie niy kapnie co jes lołz.
No i ja wypokopiyli, tak tyż zrobiyli. Baba przikwanckala sie do tego gyrichtu ze tym farskim papagajym i na tyj rozprawie sondca godo:
– Dowejcie sam na stoł tego ptoka i posuchomy!
Klotka ze tym papagajym jes już na tym gyrichtowym fajlbanku a papagaj nic. niy łodzywo sie ani słoweckiym. Łoskarżyciel podpuszczo papagaja:
– Abo tyn papagaj godoł „weg ze Kaczyńskimi!” ?
A papagaj ciyngiym nic. Sondca podpowiado:
– Fort ze Kaczyńskimi !
Łoskarżyciel i łoskarżyciel „posiłkowy” tyż powiydzajom, animujom:
– Weg ze Kaczyńskimi !
Na łostatek cołki zol napoczyno godać wroz:
– Fort ze Kaczyńskimi ! Weg ze Kaczyńskimi !
No, i yntlich papagaj napoczyno kościelnom sztimom :
– Suuuucheeeej Jeeezuuu jak cię błaagaa luuud ......