Na drugi ... dziyń

Ojgyn z Pnioków

Łońskigo roku suchołech i gawcołech jak jedyn taki szykowny karlus (sam już niy spomna jak mu boło po łojcach) tuplikowoł we telewizyji roztomajte zorty kaca, abo jak inksi godajom – kacynjamru. Som na isto bele jake kace. Przeca to znocie, pra? Możno niy ? Niy wiyrza chopy (babom tyż) !
Prawucko, to nojgorzij je, kiej cowiek mo richtik festelnygo kaca a ku tymu, kiej sie już mu udo legnońć, na śniku, zasik mu sie zdo, iże tyż mo – i to ci ku tymu fest tuplowanego – kaca.
Tak ci boło kiejsik symnom.
Łotwiyrom ślypia (wiycie, we śniku) i cuja: łeb, palica mom choby kalfas, we gymbie nikiej we starym tryjtku, lynzyk sztajfny chopy niywyszpluchtano blank fuzekla i ku tymu nabruszono szarf nikiej sztalbyszta. Kalne ślypia i telkie ci cerwione choby u mycoka, u „angory”. Wszyjsko naobkoło sie chuśto, belonce i zwyrto nikiej na naszym łodpustowym romlu. Cołki świat jes ci na wiyrch ze szłapami. Tego bali i naszygo Hermaszewskigo wtynczos, kiej furgoł we tyn „kosmos” jesce niy trefiyło.
I ... słepać sie mi chce nikiej sto pieronow. Jużcić mogbych cołko kana, srogo kana wyduldać. A we pysku ku tymu gorko i sucho choby na jakisik Saharze.
Ludzie! Poradzicie sie forsztelować? Poradzicie sie to wystawić? Duldać, nic ino duldać !!! I to wiela sie ino do !!! Musza cosik luchnońć, szluknońć bo kiej niy to richticznie sam wykopyrtna. Cosik hornońć, bele co i bele kaj, ino chocia jedyn szluk, coby już tyj hicy we japie niy boło.
Mom. Prziszołech na te idy. Nojprzodzij musza ci ze tego mojigo prykola łoroz wypolić. Musza na gwołt stanońć na swoji klepyty. Po lekusku, jednom gracom chycić sie za gowa, drugom podeprzić sie coby sie niy łobalić na tyn pychol.
Mmm, mmm, ... , jeeee, styrca, sztram stoja, chocia mi sie we łebie, we tyj mojij palicy kolybie. Wele mie wszyjsko fyrlo, kolybie sie choby na jakimsik szifie.
Musza na zicher wywoniać, wysznupać kaj tu je cosik wilgłygo, mokrygo.
Jezderkusie ! Co za karasol. Jesce kwilka a praskna na pysk. Nale, niy. Stoja. Trzimia sie szranku i medykuja kaj możno nojść cosik do picio. Możno we tyj srogij izbie ?
Ida. Kackom sie po lekuśku. Nojprzodzij trza dać pozor coby sie niy łobalić ło prog i niy piznońć pycholym we futrzina.
Darzi mi sie. Jużech jes we antryju. Blyndnońć, łoświycić ta foncla, ino niy bliknońć na wiyrch, bo mi może gowa ślecieć z gnyku.
Pozor ! Zaś idzie polnońć do proga. .... Fto ci sam tela szłapek narychtowoł ???
No, już izba. Stoł, fest poflekowany i łobdrzistany tisztuch, a na niym połno, fol pobulonych flaszek po gorzole, zeltrowek ... możno ci śnich poślywom cosik wodnitego ? Jakiesik krałzy, glaski, szolki ... jedna bonto krałza ... ło sto dioskow, ło tysionc pieronow ! tyż prożno. Krom tego ftoś do nij jesce narzigoł. Łeeee ... Nic a nic ... a w gymbie choby ftoś do nij driny piosku nasuł.
Wiym, wiym, miarkuja pojńda, pokwanckom sie do aptrytu.
Jerombol, po lekuśku, giyry sztram ... coby ino te dyliny tak sie niy kolybali. I niy świdrzyć, niy kukać na boki, bo mi sie na isto zdo, iże te ściany sie brewider na mie łobalom. Ida, tompia jesce troszycka. Jes haźlik ... Fuj ! ... cosik capi ... Ftoś tu na zicher już ci przodzij boł. Tu sie niy nasłepia.
Ała ! Moja palica ... alech sie piznoł ... po jakiymu ta roma wisi kole mojij łeby. No, chocia łokno łozewrza, ristik luft, blikna ino, możno dyszcz pokido. Ale ci mie pizło po ślypiach. Klara blyscy aże niy idzie szczimać. Trza by sam ci mieć zontbryle ... ani kapki wody ...
Mom. Zeszły tydziyń boł u mie kamrat. Łostoł sie jedyn jabol. Ja, dyć ... nale przodzij musza sie zaklechtać do kuchyni, bo skludziołech tyn jabol pod ałsgus do kibla ... Ludzie ! A we kokotku ani kropki wody; wcoraj pukła ruła sam wele mojij chałpy i te ichnie machery wszyjsko zakurblowali.
Ida, ida ... trza niy zaboczyć coby w antryju posuć ździebko pioskiym lebo hasiym. Niy byda sie tak przecam sakramyncko kiołzdoł i ... drzist. Alech ci ... prasknoł na rzić. Po leku, po lekuśku, nojprzodzij na śtyrech, za klomka ... ło pieronie, czamu te dźwiyrze tak zgrzipiom ... a we łebie mi tompie i tyrpie ci symnom choby cug przejechoł ... po ścianie ... i po lekuśku na wiyrch, sztram, stoja, ... Fto tak klupie ... i czamu tyn zygor tak festelnie glingo ? Nojprzodzij jabol. Tuch już sznupoł, Możno ze drugij zajty. Mom ! Coby mi sie ino niy strzaskoł. Łodropać ziglak i łodszpontować frop. Nale, podwiyl sie niy zicna na zesliku, niy byda jabola łotwiyroł. Czamu te grace moje tak dyrgotajom? Pozor ! Klupia flaszka łod spodku coby tyn diosecki frop wyskocoł. No, ryp ! ... Wyloz. Ło sto pieronow ... co za cuch, co za capiynie! Przeca mi cołki kichol na nice wykrynci. Samo siara ... tego sie niy do wysłepać.
Hmm ... wiym ... zrobia sie śniego grzońca. Wrzawe wino do kupy ze tymi sam korzynioma ... mmm ... to ci je richtik maszkyt.
Przod rozżygać gazkuchnia. Kaj tusam som sztrachecle ? Som, som. Kastrolik jes, flaszka łodszpontowano. Opaternie ze gazym. Pieślawo trza wloć jabol do kastrolika. No, i szkyrt, szkyrt, szkyrt ... Ludzie, trzimejcie mie. W cołkij mojij chałpie ani kropki wody. Jedne co sam je wilgłe to prawie te sztrachecle !!!
Jużcić do tego na paskuda joch sie łocucioł ze śniku. Już ci niy nynom. Nale, mom jesce barzij pierońskigo kaca.
A tak po prowdzie ... dostołech pypcia, smacysko na grzońca, wypokopiołech wrzawe wino, pra ?
A niy trza boło wysłepać ty zimny jabol ???