Możno i szport ?

Ojgyn z Pnioków

Godajom tyż łoszkliwce, że chnet bydom bajstlować szportszpile, zawody kaj bydzie szło zrobić majstra we szkryflaniu gupot bez telefołn. A som tyż i bezmać take wyturnowane, kiere bali i we kicholu dubajom kciukiym a niy srogim palcym, bo jejim uciongnoł sie taki dugi łod tych „esemesow”. No, i tak choby szportu corozki mynij u tych dziecek. Możno przijńść i tak, jak to we jednym wicu boło:
– Ecik, a cożeś to sie we graca zrobioł, iże jom mosz we gipsie?
– A wiysz, to wszyjsko bez turnowanie szportu.
– Szportu padosz? Tyś taki spaśny, to jaki ty tyż tyn szport uprawiosz?
– Ano, to skuli szachow ...
– ??? Co padosz, skuli szachow? A łod kiej ty szachy grosz? Przeca do tego trza mieć ździebko łoleju we palicy.
– Niy jo grom w szachy, ino tatulek ... i jejimu laufer ślecioł na deliny ...
– Niy poradza Ecik tego spokopić ...
– No, łojcowi ślecioł laufer na zol, jo sie na niym kiołzdnoł, prasknoł choby dugi i złomołech graca!!!
I kiej my już byli przi tym nynaniu, lebo niy to mi sie spomnieli gryfne słowecka jednygo mondroka:
„Bezsenność skraca sen, ale niekoniecznie wydłuża życie, chociaż czasem czyni je ciekawszym!”
A szport – to cygareta, a ruch – to budka ze cygaretoma. Znacy sie szport to zdrowie, pra?