Majtniyńcie ...

Ojgyn z Pnioków

Familijô przi łobiedzie, ćkajóm bez gôdki. Łoroz takô dwanôstolytniô cera sie łodzywô i łoznôjmiô:
– Jô już niy ma jóngfera ...
Zapadô gróbowô cichość, kierô przerwôł łojciec:
– Wiysz Erna – gôdô do swojij baby – to wszyjsko ino twoja wina. Łoblykôsz sie tak bereździato i spróśnie, iże za cia chopy sie łoglóndajóm na hulicy, i gwizdajóm! Mało tego, zachowujesz sie żadliwie i łoblyśnie przi tyj naszyj cerziczce.
Juzaś do starszyjszyj, dwadziyścialytniyj cery wrzescy:
– Ty żeś tyż jes festelnie winowatô! Swadźbisz sie ze piyrszym z raje karlusym na naszyj zofie, kiej ino do kupy ze mamulkóm wylezymy ze chałpy. I to na łoczach modszyj szwestry! A i jesce ku tymu môsz we szrancku tyn łoszkliwy „wibrator”!
W tym łoka mrziku łodzywô sie jejigo baba:
– Zawrzij dziub bo ci wiater zymbole wytrzaśnie! A fto wydôwo poła kôżdego gyhaltu na roztomajte szlóndry i lôtawice? Fto szpacyruje po tyj côłkij dziylnicy cerwiónych laternów ze naszóm maluśkóm cerziczkóm? A łodkiela mómy telewizyjô kablowô, ciyngiym łoglóndôsz „pornusy” bali i przi tyj maluśkij! Nó, i ta twoja szlómpatô i szmodrowatô sekrytarecka. Myślisz, iże jô niy miarkuja po co tyż łostowôsz we robocie na bajka?
Połnô zwóntpiyniô i beznadziyji mamulka zwrôcô sie do swojij cery:
– A jak sie to wszyjsko stanyło?
– A to wszyjsko bez naszô rechtórka ... Zwekslowała, zmiynióła mi róla we jasełkach, herodach, we tyj bożonaródzyniówyj betlyjce. Jô niy ma już jóngfera ino byda we tym kónsztiku ... pastyrkóm!!!