Latowy śnik

Ojgyn z Pnioków

Siyrpiyń to tyż jes na isto gryfny, szykowny miesionc na roztomajte wywczasy ... i na opresyje ...
... Kukom ci tak zgnioło jak jakisik luftinszpektor, a sam, ku mie idzie ci frela, zgorano, łopolono choby łojca Nyjgra miała, duge wosy, blondina ... a jak gryfnie tymi łogibami fyrtała, jak sie gryfnie zwyrtała ... te szłapy, dugaśne „wydepilowane” (jak to terozki je we modzie). Lejzie ci ku mie, kroczo, a na tablecie gryfny „drink” ze lodym i apluzinom. A łona ci tyż wonio jakimiś francuskimi parfinami i cymsik tam jesce. Szluknołech rołz, drugi, i jesce tuplowanie a łona ci mie biere pod parza i smycy do morza. Wele na tym morzu choby u nos we Parku Kultury na downiyjszyj „Fali” (i kaj terozki zrychtowali tako gryfno plaża), lekuśki wiaterek, modro wodzicka. ... Wlazujymy ci łoba polekuśku do wody, opaternie, jo troszka przodzij, łona pieślawo deczko za mnom. Łona ale niy kce na ibera i beztoż jo jom lewom rynkom grajfuja pod brzuch, jezderkusie aże sztrom bezymie przelecioł. Łona tak mi sie jakosik omskła, iżech – coby sie niy tonkła – chycioł ci jom za te dychanie. Jezderkusie, pewnikiym te Arabery, kiere deptajom do tego ichnigo niyba – kiej prasknom kigoś Żyda lebo Amerikona – muszom tak sie cuć, abo cosik wele tego ... No, toż przekuldypła sie na plecy, jo tyż, cycki sztram nad woda wystowajom, na słońcu robi sie deczko soli na jeji sztramskim brzuchu, richtik moc szykownym brzuchu ....
– Jeronie! Ojgyn, ustoń diosecki łochyntolu tymi klapytami przebiyrać, gracami w lufcie wywijać chobyś kajsik na basingu szwimowoł, abo mioł sie tonknońć. Jesce pierońsko krapyko Mamulce chebniesz tyn kafyj i terinka ze zistom na tepich. Śnik jakisik miołeś, abo co?
No, ja. Możno to i jakisik śnik boł, a to na isto skuli tego, iże latoś na żodne wywczasy niy jadymu i tela. Śnik, niy śnik, ale gryfny. I Wy tyż dejcie pozor, bo przi takij hicy jako boła we lipcu i tydziyn tymu nazod, to przeca kożdymu mog prasknońć na palica, kiej zawczasu jakigosik piwa, lebo inkszego „drinka” cowiek niy szluknie dlo łochłody. No, co joWom byda sam tela tuplikowoł, eklerowoł. Same wiycie, co dlo obyczajnygo chopa, i niy ino, jes dobre.