Lato i po lecie

Ojgyn z Pnioków

Co jo tam byda wynokwioł. Terozki jes już po lecie i spomniało mi sie jak moja somsiodka Kopyciokowo z letniska do do przijechała. Przilatuje do mie taki jedyn buks ze drugigo sztoku i łod dźwiyrzy śmieje sie pod śpikiym.
– Panie Ojgyn, suchajom łoni ino. Mie to sie wydowo, iże Kopyciocka musi po tych wywcasach mieć cołkiym słodko gymba.
– Coż to ty Hanysku fandzolisz? Kopyciocka i słodko gymba? Cyś ty cołkiym łogup, blank na ipta wylazujesz?
– No ja, panie Ojgyn. Jo to tak medikuja, iże to skuli tych piegow. Co jo sie na nia kukna, to mi sie spomino kołocz ze posypkom, kiery nasza starka zawdy piekom.
Co prowda, to prowda, chocia jak jo sie wejrza na moja staro, to mi sie wszyjsko spomino, ino niy kołocz ze posypkom. Nale, tyn śpik to tyż pewnikiym kiejsik zmondrzyje, kiej sie już roz do imyntu łobabi, Pra ?