Koniec świata ...

Ojgyn z Pnioków

Wrożycie sie ciyngiym jak by sam zrychtować i nasztimować Gody na bezrok i daslszij? Niy tropcie sie już blank. Stare planety godajom, iże możno za jakiesik piyńć lot żodyn już niy bydzie mioł ze tym utropy. A po jakiymu? Ano beztoż, co już 21 grudnia 2012 roka mo być prawy „koniec świata”, richticzny fajrant ze tym nojlepszyjszych ze światow. No ale, trza by sam napocznońć – jak godoł Horacy: „Ab ovo usque ad male” co idzie na nasze przetłomaczyć „łod jajec do ponek” znacy sie – „od poczatku do końca’.
Momy przeca na świycie trzi blank srogie religie – jak to mondroki godajom – „monoteistyczne”, kiere za pierona niy poradzom sie dogodać co do jednygo: eźli przinoleżi deptać do koscioła na mszo we piontek, we sobota abo niydziela? A podwiela tego niy poradzom do łostatka wyszpekulować, to co dziepiyro mo być ze tym jednym jedzinym dniym we kierym mo być, mo przijńść na nos tyn szlus naszygo świata ? Przeca bali i te cołkie Świadki Jehowy tyż ci już terozki niy podowajom roka, bo ino we XX wiyku planetowali aby dziesiyńć razy, co bydzie szlus ze światym, a kiej sie cowiek już łoparzi, to ci to tyn fal naumi go pozorności. Jużzaś Muzelmany łobstowajom przi tysioncpiyńćsetnyj rocznicy wykludzynio sie proroka Mahometa ze Mekki, co jes tyż na isto szykownom łokrongłom datom tela, co pomyko cołki gront aże do 2122 roku tyj naszyj krześcijanskij ery. Tak by tak, te przesilynie zimowe we 2012 roku flichtuje wszyjskim religijom. A to bezmać beztoż, iże te datum trefiyło do nos direkt ze zaboczonyj dżongle a niy ze Bliskigo Wschodu. Wziyno sie to wszyjsko ze kalyndorza Majow, kiery mo fajrant gynał we tym dniu, we tego 21 grudnia 2012 roku. Wiycie, ta cołko ci „prekolumbijsko” cywilizacjo zapochoniyła sie tak po prowdzie kajsik kole XI wiyka. Jak ci to tyż sie galantnie skłodo, co tameszne mondroki łobcyrklowali we jejich kalyndorzach prziszłość ze takom ci tysionclytniom nadmiarom już po jejich zapodzioniu sie.
Ale, niy jest to jedne przepejdzynie. Na tyn 2012 rok skazuje tyż taki gryfny „kod biblyjny”. Bezmać kajsik we 1994 roku hormijo izraelickich mondrokow– podszukowaczy łozknołtlowała, łodczytała po ichniymu starotestamyntowo „Ksiynga Rodzaju” we „Bibliji” i wykozali łone, iże tam tyż idzie richtich cosik sie dosznupać, co jes skuplowane ze naszymi czasami. Mondroki godajom, iże we biblijce idzie wynuchtać i take wrożby ło II Wojnie Światowyj, i ło tyj atom-bombie. Tu tyż sknołtlowane to jes ze datom łostatka tego naszygo świata, kiery moge padnońć skuli wojny atomowyj abo skuli tego, co Ziymia moge sie strzaść ze jakomsik niy za srogom „asteroidom”. No, i boł bezmać taki istny, prorok Malachiasz urodzony we Irlandii (świyntym łoznojmiyli ci go we 1190 roku), kiery wykłodoł, iże łostatnim na tym świycie Łojcym Świyntym bydzie tyn, kiery przijńdzie po Benedykcie XVI. Te zwekslowanie sie papiyży mo być neści tyż we tym 2012 roku. Mogbych sam tak i pora godzin berać tela, co spomna sam ino jesce ło Chincykach, ło „proroctwie Orlona” (kiery tyż skazowoł na 2012 rok), ło planetowaniu Edgara Cayse’a – wroża ze Hameryki, Italijoka Mario de Sabato i wieluch inkszych, no i tego Michela de Notredame ze Saint-Rémy mianowanego Nostradamusym. No, i ło ludziach kierych planetowanie poskłodali inksze do kupy we takij ksionżce „Mass dreams of the future”. Ale, ale, na ta „asteroida” astronomy, gwioździorze sztyjc mustrujom, jednym ciyngiym kukajom, bo łona tak sie we tym kosmosie furgo i moge richtik we tym 2012 roku we ta naszo ziymia prasknońć.
Mocka tyż boło do terozka ludzi, roztomajtych mondrokow, kierzy kcieli na swoj knif wyeklerować inkszym wszyjsko ło tym „końcu świata”. Taki na tyn przikłod Lawrence E. Joseph, ftory we jejigo „Apokalipsie 2012” pometloł gynał wszyjsko, co ino poradzioł do kupy sknołtlować. Byli tam i łomyny starożytnich Indiow, roztomajte tajymnice laborow ruskich gyjofizykow, fachmanow łod badanio Słońca, wulkanow, klimy i diosek wiy cego tam jesce.
Byli tyż i jesce inksze fale. Ludzie przecamć miyniyli, iże jedyn papiyż św. Sylwester we 317 roku zawar ci we podziymiach Watykanu srogigo dracha. Wedle staryj powiarki, tyn drach mioł wykludzić sie ze tych podziymiow we jarystag skonanio świyntego i przetyrmanić cołki świat, kiej ino sie napocznie tysiynczny rok. We nocy 31 grudnia 999 roka wszyjskie ludzie na tym niy nojgryfniyjszym ze światow byli moc przelynkniynte i mieli blank miyntkie szłapy. Kiej ale już po połnocce blank nic złygo sie niy stanyło wypraskła festelno uciycha, ludzie sie radowali choby jim fto szykowno zista łobiecoł. Gryfno to gyszichta, prowda? Tela, co łona niy jes prowdziwo. Jes ale tyż i gryfny byfyjl, dlo kożdego bali i do tych naszych posłow i reskiyrujoncych naszom Polskom (możno ci już i Ducka Donalda ze jejigo kamratami niy bydzie?). Tyn dziyń 21 grudnia trefio przed Godami. Łopytowujecie sie możno i
co ze tego? Ano, nic, smoloł pies, żodne nos tam drachy niy wystrachajom. jakiesik take: „ ... pesymizm ekonomiczny, spadek siły nabywczej, niepokoje społeczne ...” i take tam jesce inksze gupoty, kiere nom ciyngiym wstyrkajom te ze wiyrchu, te angyjbery ze Wiejskij we Warszawie.
No, toż jakech pedzioł, łod 2012 roku niy tropcie sie, niy musicie sie blank hruzić ło to, jak urychtować Gody, bo Bożygo Narodzynio już sporzij na isto niy bydzie. Ale podwiyl co latoś jesce muszymy to jesce jakosik ściyrpieć niy ino Gody ale jesce ku tymu i Zilwestyra i tyn srogi niyskorzij kacynjamer !