Klinika

Ojgyn z Pnioków

Rano, ćma ... no, możno niy tak blank rano, bydzie wele połednia, we ślypiach ćmi sie jak sto dioskow i moty ciyngiym furgajom a szczyplawo chobych bez śtyry godziny durch gawcoł sie we szwajsaparat, lynzyk nikiej zola z tryjtkow a we gymbie smrodlawo chobych złyknoł niy prane trzi tydnie fuzekle. Ku tymu we gowie briwy i cukrowy romplujom choby fto na szlagcojgu proł.
Co tam byda wiela tuplikowoł. Przeca kożdy porzondby chop to zno. Styknie co rzykna, iże Bercik przipytoł mie na abszicfajer swojigo synka, kiery sie za dwa tydnie bydzie żynioł. Nic, ino cowiekowi sie zdo co zarozki wykopyrtnie, świtnie abo ... dokulwito sie do Pyjtrowego szynku na piwo.
Łoroz glingo telefołn. Ludzie! Choby fto ściep ze trzecigo sztoku ze piytnoście piyrwyjszych kanon na mlyko. Abo, by praskli żeleźnianne dźwiyrze we werku. Chnet umrzitniynty biera te cedzitko do dakla ... nale ze daleka coby mi palica niy pukła ...
– Halo! Klinika ...?
– Jezderkusie! Jako klinika? Cowiek niymocny, po chopsku, po gorzole, nale coby zarozki ze lazarytu glingali?
Ciepnołech dyć cedzitko na widołki i biera sie coby omszlag sie na łeb prziflostrować.
Drrr, drrr ... zasik telefołn.
– Halo, halo! Klinika ...?
– A dyć dejżysz ty pieronie pokoj ze tom klinikom, bo kiejbych cie scopioł, mioł przi sia, to jakbych cie prasknoł bez pysk tobyś seę gynał szłapami deknoł!!!
I juzaś gichnołech cedzitko na widołki. Kwilka pokoj. Możno ci już niy bydzie cowieka tyn diosecki łochyntol szterowoł? Możno udo sie mi trefić zeltrowkom do szolki coby chocia ździebko do tego chyrtonia nakidoć podwiyl niy lajstna sie sznapsa ze piwym.
Drrr, drrr, drrr ... biera ta suchaowka i już kca gizdowi nazdać choby świni do grotka aże suchom a tu Bercik zachrapociałym głosym chby Armstrong godo:
– Ojgyn, niy łodkłodej, doczkej kwilka. Jo cie ino kcioł spytać eźli szlukniesz „klinika”?