Gorol i pijondze

Ojgyn z Pnioków

To wszysko dobre, bo tak po prowdzie, to już corozki mynij do sie łodrożnić, wymiarkować fto jes Gorol a fto Ślonzok, i to niy ino po łachach (to ci dziepiyro boł cyrkus kiej gorol szlips i lakiyrki łoblyk i srogigo „intyligynta”markiyrowoł). Chocia musza pedzieć, iże gorol rychlij na swoje wylejzie niźli Ślonzok.
Boczycie, jak to goroli za Giyrka gnali do nos na grub abo do werkow? Telkigo, istnego Jontka tyż staro wyrzynyła na Ślonsk do roboty. Boł ci we jednym werku, drugim i bali we Hucie Katowice, a wszandy ci sie go pytali cy umi cytać i pisać. A tyn istny niy poradzioł. Skuli tego pojechoł ci łon boł aże do tyj Hameryki.
Kiej sie już we tyj Hamerice łobrobioł, prziduboł tych dularow, chcioł lajstnońć swojij staryj jakisik gyszynk. Wloz do jubilera, wybroł sie tako rubachno keta ze goldu i napoczyno za nia bulić tymi dularami. Jubiler, tyż telki Hamerikon ze łodzysku, no Wiycie, Żyd łod nos, kiery jesce naszo godka spokopioł, cołkiym łogup, wystraszoł sie na fest i pado ci do tego naszygo Jontka:
– Jezderkusie! Chopie, fto terozki w Hamerice tela betkow smycy we kabzi? Przeca mogom łobrabować, łokraść i niy dej Ponboczku, zaciukać na śmiyrć. Terozki to sie ino telki „czek” wyciongo, szkryflo sie wiela ci sie przinoleżi, podszriftuje i fertik.
Jontek tak sie gawcy na niego, cerwony sie robi na gymbie i cołkiym nerwowy godo do Żyda:
– Kiej bych pieronie, poradzioł cytać i pisać, to bych terozki we Hucie Katowice robioł a niy tyroł we tyj wrednyj Americe.
No i mocie cołkigo gorola!