Faszing

Ojgyn z Pnioków

Nale, faszing to faszing i tela. Poberom ździebko ło tych czasach kiejech rod pyndalowoł na roztomajte muzyki, na roztomajte tańcowaczki i ... to niy zawdy ino ze mojom Elzom. Jadymy podle raje:
Tak ze kielanoście lot tymu nazod trefiołech na drodze jednego kamrata, starego fernioka, znacy samotnygo.
– Ojgyn, dobrze co cie widza! A jeżeś to już żyniaty?
– Ja – padom mu na to – już łod gryfnych porunostuch lot!!!
– A jeżeś zowistny, zazdrosny fest?
– A dyć, jak sto pieronow ... zowiszcza tym, kierzy jesce babow niy majom!
Bo ze mojom babom zawdy boły komedyje. Kiej ino łobsztalowołech bilety na jakosik zabawa to sie napoczynało: A to niy mom co łoblyc, a to szczewiki niy som we modzie, a to juzaś bubikopf trza łod nowa u golaca bajstlować, a to tam jesce inksze telkie mecyje. A kiej już prziszło co do cego, to juzaś trza boło dować pozor na kamratow, na to coby gorzoły za tela niy słepać, a już kiej na zabawie napoczynołech:
– No, toż szluknymy za nasze babeczki i „kochanki” ... coby sie nigdy do kupy niy trefiyły!!! to już staro poradziyła mi cołki tyjater zbajstlować.
A przeca żodno balanga niy łobyjńdzie sie bez sznapsa. Przeca same znocie telkie ałsdruki:
„Klara świyci, ptoszek kwili, możno by my co szluknyli.”
lebo:
„Zeks to niy wszyjsko, łostowo nom jesce piwsko!
No, tego toch niy mioł sam terozki godać. Styknie, rychtujymy sie ....
– A wiysz, iże ta twoja kamratka Frida sie na mie łod łońskigo roku gorszy?
– Po jakiymy, po jakiymu?
– Ano, skuli tego coch sie jom cosik spytoł.
– Ja, a co żeś sie jom spytoł?
– Po pierona sie ciytngiym tym lipynsztiftym sztrajchuje?
– No, i ...?
– Pedziała mi coby lepszij wyglondać ... toch sie jom spytatoł: a po jakiymu n i y w y g l o n d o ???
– Wiysz Ojgyn, a Erna to juzaś na ta zabawa przijńdzie ze nowym szacym! Łod kiej łogdowiała to co trzi tydnie mo nowygo karlusa, co łoni we tyj staryj kalymbie widzom?
– Niy poradza tyż spokopić, nale łona jes łod cia cheba ze dwadziyścia pora lot modszo...
– Ojgyn! A ty wiysz, iże snami do kupy bydzie Jorg ze swojom starom?
– Wiym, wiym i to bydzie dlo mie nojwiynkszo utropa. Bo kiej łon napocznie łozprawiać ło tych jeji chorobskach to jo tyż zarozki musza jakiesik „relanium” łyknońć cobych zarozki niy glingoł po pogotowie.
– Ojgyn, nale tyn twój kamrat Zefel to latoś cheba niy idzie snami, pra?
– A czamu miołby niy pojńść? Zawodzo ci to?
– A zawodzo! Bo łon blank niy poradzi tańcować i łońskigo roku tak mie podeptoł, iżech trzi razy musiała hołzynsztrymfy zwekslować, bo mi ciyngiym lałki, maszki leciały. A ku tymu łon sie Bog wiy co ajnbilduje, telki je zawdy we sia zadufany a do dzisioj niy pochytoł tego konsztiku jak gynał wetkać hymda do galot coby spod westy ta jejigo wampa niy wylywała sie na galoty, kiere zawdy mo za sztram, za knap, choby po modszym braciku.
– Niy jamruj, niy wajej, bo kiej jo już musza deptać tańcować ze tom twojom kamratkom Hildom to niyskorzij mom cołki ancug poflekowany kiej jeji tyn cołki puc ze gymby, dychanio i pelcyskow ślatyje.
– To jom tak giździe przi tym tańcowaniy niy ściskej, niy łobłopiej chobyś ze jakomsik Grace Kelly lebo tom cornom Naomi Cambell tańciyrowoł!
Niy, byda ze Ernom ciyngiym walcowoł, ło kieryj godali kiejsik telki szpas, iże poszła ło weta ze jeji starym, co wylejzie na plac przi familoku blank sago, tak jak jom Ponboczek stworzoł.
– Jezderkusie, Gmyrcyno! Eźli by to boła naszo Erna ze drugigo sztoka – pado jedna deczko ślepawo somsiodka do drugij.
– A toć, iże to łona – pado drugo.
– Jeronie, nale tyn klajd, kiery miała na sia to mogła by sie chocia ździebko wybiglować, pra?
– Elza, a briftryger ze pynzyjom łod Świekry boł dzisioj?
– Niy, niy boł!
– No, to wyszaltruj telewizyjor i idymy nynać ... to możno na jakosik gryfno balanga chocia we śniku pojńdziesz ???
Tak jesce blank na lostatek telki wic, niy wic a możno prowda? Jedyn łożyrok zahaltowoł taksa na ceście. Taksiorz kuko tak na niygo filuje i godo:
– A kaj tyż to ???
– A na postoj giździe bo tam mocka ludzi na wos niy poradzi sie doczkać.
Możnoście to już kajsik suchali skorzij lebo czytali, ja? Eźli ja, to niy godejcie żodnymu, niy wyfaflejcie tego; możno sie inksze niy kapnom. Bo ta gyszichta mi sam dzisioj gynał klapowala po tych wszyjskich Zolwestrach i inkszych tam jakisik balangach, kiere bajstlujom bez tyn faszing. Tarozki jo już możno mynij fyrtom bele kaj boch już tyż ździebko zwiekowoł nale szkrabka na dobro muzyka to jo mom zawdy i wszandy.