dwa ałsgangi

Ojgyn z Pnioków

Łojciec, a dyć rzyknijcie mi co je lepszij: mom się żynić lebo niy?
Synek to je tak. Zawdy mosz dwa ałsgangi (wyjścio, kiej fto niy wiy). Terozki tyż. Abo się łożynisz, abo pońdziesz do wojska i łostaniesz wojokiym.
I zaś mosz dwa ałsgangi.
Kiej się łożynisz to mosz na zicher przedrzistane. A kiej pońdziesz do wojokow zasik mosz dwa ałsgangi..
Abo bydzie krucafuks wojna, abo jeji niy bydzie.
Kiej wojny niy bydzie to mosz przedrzistane. Nale, kiej wojna bydzie zaś mosz dwa ałsgangi.
Abo cie weznom do lazarytu haźliki pucować, lebo cie prziflostrujom do kanonow.
Kiej cie weznom do lazarytu to mosz przedrzistane. Nale, kiej cie prziwachuko do kanony to tyż mosz dwa ałsgangi.
Abo cie zatrzasnom, abo bydziesz jesce żoł.
Kiej bydziesz żoł to mosz zołwizoł przedrzistane. A kieby cie zatrzaśli, to zaś mosz dwa ałsgangi.
Abo cie pochowajom we piochu, abo we lesie.
Eźli cie pochowajom we piochu to mosz przedrzistane, nale kiejby cie pochowali we lesie zasik mosz tuplowane ałsgangi.
Abo wyrosnom na cia blumy, abo jakiesik drzewo, jakisik strom.
Kiej wyrosnom blumy, to mosz przedrzistane. Nale, kiej zaflancuje i wyrośnie strom, dubelt mosz dwa ałsgangi.
Abo cie przełonacom na bigelbrety abo przemelajom na szajspapior.
Ło wiela ze cia zbajstlujom bigelbrety, to mosz na zicher przedrzistane. Nale, pokiel cie przełonacom na szjspapior, zasik mosz dwa ałsgangi.
Abo cie łobieszom we chopskim haźliku abo we babskim.
Eźli cie wciepnom do chopskigo aptrytu, to mosz juzaś przedrzistane, a eźli do babskigfo haźlika, to mosz zaś dwa ałsgangi. .....
Niy chichrać się mi tam we winklu!
Abo cie wychechlajom ze zadku, abo wyszkyrtnom ze przodku.
Kiej cie wyłonacom ze zadku, to mosz przedrzistane. Nale, ... kiej cie wymelajom ze przodku to ... dej się pozor, to tak nikiej byś się chopie przodzij łożynioł !!!

Ojgyn z Pniokow

(na podstawie skeczu prezentowanego przez Andrzeja Grabowskiego)