Czamuch wyciep sekrytarka ...

Ojgyn z Pnioków

Tak jakosik bez lato pizło mi ... siónt lôt ale jakbych blank tego niy merknół, blank niy przifilowôł. Miôłech ino nôdziyja, co z rańca, przi śniôdaniu moja staro mi gryfnie powinszuje, możno i bydzie miała jakisik szykowny gyszynk dlô mie. Ale łóna mi ani pyrsk niy pedziała kiej wylazowała do robota a ło winszowaniu lebo gyszynku blank już niy bóło gôdki. Myślołech, iże chocia dziecka bydóm pamiyntać tela, co łóne tyż wećkały śniôdanie i niy łozwali sie ani słóweckiym.
Kiejech jechôł do roboty, czułech sie taki jakisik samótny i taki możno (jak ci to móndroki gôdajóm) – „niydowartościowany”. Kiejech ino wlôz do biura moja sekrytarka szykownie mi powinszowała na tyn mój gyburstak i na doczkaniu poczułech sie ło wiela lepszij. Ftoś jednakowóż łó mie pamiyntôł!
Miôłech mocka roboty i bakołech tak możno do drugij po połedniu. Kole tyj godziny wlazła rajn do biura ta moja sekrytarka i rzykła ku mie:
– Dzisiôj jes taki gryfny dziyń, na przidôwek jes wasz panoczku gyburstak, to możno wykludziyli by my sie tak do kupy do jakigosik restałrantu, zjedli wroz sztramski i szmektny łobiôd?
Zarozki żech sie zgódziół i to ci bóło nôjmilyjszô rzec jako żech łod rańca usłyszôł. Pokwnckali my sie wroz do takigo na isto całbrownygo restałrantu, zjedlichmy szmektny łobiôd we przijymnyj atmósfyrze i wysłepali my pôrã lampusów wina. We dródze powrótnyj do biura ta moja roztomiyło sekrytarka pedziała mi jesce:
– Dzisiôj jes taki na isto piykny dziyń. Eźli my muszymy sie terôzki wrôcać nazôd do teg łoszkliwego biura?
– Nó, ta po prôwdzie to niy muszymy! – łodpedziôłech dziołsze.
– Nó, to pódźmy dó mie – dała do wymiarkowaniô sekrytarka.
U nij szluknyli my sie jesce po bómbce kóniaku, połozprawiali deczko a łona na łostatek zasógiyrowała:
– Cheba niy môsz nic na prociw tymu, jeźli jô pójńda do drugij izby i przebleka sie we cosik barzij wygódnygo?
– Jezderkusie, nó przecamć! – zgodziółech sie bez kwilki wahaniô.
Poszła pomaluśku do drugij izby, a łobyrtała ku tymu łogibami jak jakosik Claudia Schiffer abo inkszo Naomi Campbell (tyż ci bóło łopolóno choby razinku przikludziyła sie ze Ygiptu) a po pôruch minutkach wylazła ze tabletym na kierym bóła szykownisto torta do kupy ze ... mojóm staróm, dzieckami i Świekróm. Wszyjskie mi piyknie zaśpiywali „Sto lôt” a jô ... a jô ... kurwa ... siedziołech na zofie we samych fuzeklach !!!