Czamu słepiom?

Ojgyn z Pnioków

Moja staro ciyngiym mi dziura w basisku borowała po jakiymu chopy durch słepiom ta gorzoła. Kiejsik żech niy szczimoł. Kozołech ji sie zicnonć na zesliku, zawrzić japa i dać pozor. No i zaconech ji to gynał tuplikowac choby nasz kapelonek we tym miesioncu ze szperom na gorzoła. Bo to je baji tak:
Som roztomajte zorty łożyrokow i możno jejich wszyjskich niy byda poradzioł zrachować – bo mie tyż już ta sklerołza dopadła – nale byda to, podwiyl jeżech jesce trzyźwy, pomaluśku skłodać.
Gorole pijom skuli upadowy. Przeca wszyjsko u nich je na szago i bali na jakisik berdze możno ukiołznońć, łobalić sie abo i szłapa połomać. To ci już lepszij cosik przodzij szluknońć dlo wogi.
Kaszuby duldajom beztoż, iże wszandy majom wilgło. Łod morza jejim ciongnie to i we chyrtoniu tyż ci ta wilgłość trza chycić – no to Kaszub musi luchnońć chocia jedna laga.
Kurpie chlapiom ino ze strachu, naobkoło lasy, roztomajte bezkurcyje po nich tyrajom, to dlo łopowogi możno decko wytintać.
Ruskie tutajom zgwoli zimna. Mojigo starego kiej ruskie wziynli ci łod nos we śtyrdziestym piyrszym, to sie dziepiyro tak richtik łogrzoł tak kole śtyrdziystego łosmego .. pieronie, przijechoł nazod do dom taki nagrzony, że .. dejcie pozor!
Czechy muszom wyżrić skiż tego, iże majom telkich somsiodow jak my. Chocia terozki to chnet cołko jejich gorzoła wandruje na puklach tych, co to jejicj mrowcoma mianujom, zołwizoł do Polski (i tak już bez poranoście lot).
Miymce to sie nabzdryngolom bo ... no, jak by wom to wyeklerowć ? Widzieliście Niymca, wiycie jak taki pieron wyglondo ? No, taki Niymiec rano sie łocuci, wlezie do haźlika, wejrzi sie we zdrzadło i kiej łoboczy w niym takigo szwoba to ... zarozki ze cyjntla abo halba musi hornońć.
Angliki tintajom zgwoli tego ciyngłygo ćmoka – jak sie szluknom to choby im sie fakla zapoloła pod deklym.
Japońcyki to ci słepiom z neca abo cosik wele tego, jakiesik zaki, sake abo inksze diosectwo.
Indianery to tak ci na isto niy wiym po jakiymu łoni muszom bzdryngolić nale bezmać coby jejim niy zbladła ta cerwiono fresa.
Chińcyki chlapajom coby zapić te roztomajte robole, glizdy i take tam co łoni żerom, kiere bez gorzoły niy przecisnom sie bez chyrtoń.
Poznanioki słepiom tyz richtik fest, nale ... kiej jejim ino fto postawi.
Szwiece, te łod kopyta, chlejom, bo niy poradzom sie doczkać pyndziałku. A we pyndziałek, to łoni majom te słepanie naszkryflane we „konstytucyji”, pra?
Kawalery zasik to tintajom skuli samotności. Mamulki zawdy jejim godali coby przed śnikiym trzimali grace na pierzinie, to co majom robić ? Uszom sie ciornońć.
Wojoki ze tego, iże im sie ciyngium ckni. Przeca sami wiycie, iże we kasarni jedyne co jesce szczylo to ... fropy łod flaszek.
Te co durch pontujom (no, te pielgrzimiorze), i ciyngiym wiskajom:
„Jak dobrze nom zdobywać gory ...” (kiej deptajom na Jasno Gora), to tutajom bo ... po prowdzie niy wiym czamu, nale somech widzioł łońskigo roku pieronym dupny niyszczysny fal kole Czynstochowy. Boło ci to jużcić na zicher „czołowe” praskniyńcie dwioch pielgrzimek, ze cego jedna boła – jak to sie terozki gryfnie godo – „uprziwilejowano”, bo boł to pońć ... policajtow. !
Żyniate te, to ci na zicher wiedzom skuli cego muszom, padom, muszom cosik wyżrić .... te, synek, ty sie niy lachej. Kiej ty sie tyż łożynisz, to chnet na isto spomiarkujesz czamu chopy durch słepiom.
Przijńdzie telki kawaliyr do chałpy, idzie do kilszranku, tam nic niy ma, to depto niyskorzij do prykola. A żyniaty? Przilazuje do chałupy, gawcy do prykola.. i tam nic gryfnego niy ma to ... idzie do kilszranku !!!
No, tak cie gowkuja, iże moja Haźbiytka tyż to spokopioła i do mi już terozki pokoj, i niy bydzie mie szterować kiej przińda ździebko dzisioj ścioprany. Pra ?