Cycki

Ojgyn z Pnioków

Moj kamrat Ecik łod Pytlicki to sie łostatnio jakisik łoklapniynty i na fresie posmorszczany zrobioł. Na isto, niymocny. I to niy coby go łoroz cosik targało. To niy. Ino wiycie, mu sie ciyngiym zdo – a prawioł mi to na słodach we naszyj siyni – iże na co ci wejrzi, to sztyjc widzi babskie cycki.
Widza, iże sie karlus tropi – bo to idzie ło rozum przińść – tociech go smowioł coby poszoł do dochtora.
Pokwanckoł sie Ecik do lazarytu i mocie anong? Trefioł choby na łostuda na gryfno dochtorka. Ta mu sie kozała zicnońć na taki skorzanny hoker, wybadała co i jak, i zacyno:
– Panie Pytel, pedzom mi Łoni – a pokazuje mu apluzina – co Łoni widzom ?
– Ano, dochtorko – pado Ecik to je jedyn cycek babski.
– Hm, ... a terozki coście panie Pytel doźdrzili? – pyto sie ta dochtorka i pokazuje mu gryfno, zowcito birna.
– Tyż babski cycek – pado cołkiym na richtik Ecik.
Dochtorka sie tak ździebko zgańbioła, licz jaji sie zacerwiyniyli, filuje tak naobkoło po tyj izbie i łoroz pokazuje Ecikowi telki epny weker, kiery tyczoł we winklu izby.
– Mogom mi Łoni pedzieć co jejim sie spomino?
Ecik luknoł ze zadku, kuknoł z przodku, robi sie cerwiony na pysku i tak cołkiym po cichuśku – a ciyngiym sie gawcy na tyn pyndel łod zygara, kiery kiwo sie roz w lewo, roz we prawo – kiwo gowom nikiej tyn pyndel.
Kuś-kuś, kuś-kuś, kuś-kuś, tak choby kuskowoł dwa babskie cycki.

Senior

Pora lot tymu byłech ze moim - jeszcze wtedy małym - synkiym we zoologicznym łogrodzie w Chorzowie. Kupili my se te bileta w kasie i włażymy rajn. Tak łażymy po tym zoo tam i nazot i nagle mój mały mie pyto: Łojciec, a co to za dziwadło we tyj klotce. A stoli my prawie przed klotkom afów. No to mu fajnie łodpowiadom, co to som afy. Ale jakiejsik pieron zaroz mie poprawio, co to niy afy som ino małpy. Musza pedzieć, co wnerwioł mie trocha, ale nic niy godom i ida ze synkiym dalyj. Naroz przełażymy wele elefantów i zaś sie mie synek pyto o tego stwora. Wiync mu godom co to jest elefant. Niy wiym skond tyn pieroński łochyntol sie wzion, ale zaś mie poprawio, co to niy ma żodyn elefant, ino słoń. Po leku miołżech tego dość, ale wybawioł mie synek, kiery naroz pado: łobejrzom sie łojciec TO JE GOROL.