Baba

Ojgyn z Pnioków

Wylazła baba tak na łodwieczerz przed chałupa. Blank po leku pokwanckała sie ku dźwiyrzom łod zegrody. Podciongła se te swoji „silikony”, styrcy i fest ci medikuje:
– Możno fto przyjńdzie cestom kole mojij chałupy ... abo i niy. Doczkom kwilka i spomiarkuja sie cy fto bydzie cosik kcioł łodymie abo niy?
Styrcy i filuje. Filuje i styrcy, nale nikaj żodyn sam niy tompie. Łozglondo sie, wytyko gowa za łogrodzyni. Nic. A cni sie ji choby przi jodle hawerflokow bez łomasty.
– Jeee, ftosik depto. Fto tyż to może być? Możno ftoś, kierego znom? Abo i niy? Możno bydzie cosik chcoł łodymie ... abo i niy?
Gawcy, gawcy, nale skuli tego, iże niy mo przi sia breli i tak wiela niy dojzdrzi przed śćmiywkiym.
– Możno tyn ftoś przijńdzie ku mie ... abo i niy? Kiej przijńdzie to sie go spytom co chce ... Abo i niy. Bydzie kcioł pedzieć, to som rzyknie. Niy bydzie kcioł, to jo niy byda przecamć telko wrazitko.
Idzie Bercik, tyn łod lasa, Tako cielepa i ślimok.
– Ciekawość. Spytom sie kaj depce... abo i niy? Możno bydzie kcioł pedzieć? Abo i niy. Doczkom aże dojńdzie.
Bercik dokuloł sie, łostoł stoć przi sztachytach i gawcy sie babie gynał w ślypia.
– Ciekawe co tyż łon kce? Spytom sie go ... abo i niy. Bydzie kcioł pedzieć co kce, to powiy. A kiej niy, to niy.
Bercik łozewrził dźwiyrka, wloz rajn na plac, wyrzynoł wespa, kiero kole niygo furgała i stanoł sie kole baby.
– Ciekawe. Wloz na moj dwor. A jo niy wiym co chce? Spytom go ... abo i niy. Bydzie kcioł pedzieć co kce, to rzyknie. A kiej niy bydzie kcioł, to niy. Jo tam tak po prowdzie niy musza tego miarkować!
– Pojńdź babo symnom do komory – godo Bercik – i biere ci jom pod parza.
– Ciekawe. Po kiego dioska łon kce cobych śniym pomajtała do komory? Spytom sie go ... abo i niy. Bydzie kcioł godać to powiy, a kiej niy, to niy.
Bercik wkarycoł sie za babom do komory, chycioł za łogiby i kozoł ji sie gibko seblykać.
– Ciekawość. Bercik trzimie mie za połrzitki i koże sie seblyc. Spytom sie po jakiymu mom ściepnońć i zapaska, i kiecka, i ku tymu cycynhalter? ... Abo i niy. Bydzie kcioł skozać, to powiy, a kiej niy, to niy.
Bercik ciepnoł baba na prykol, wloz na nia ...
– Ciekawe zwoli cego łon ci mie sfaloł na tyn prykol i wloz ci na mie? Spytom sie go... abo i niy. Bydzie kcioł pedzieć, to som mi rzyknie. A niy bydzie kcioł, to niy bydzie godać i szlus.
Bercik nikiej na chopa przistało zwyrtnoł baba ze trzi razy, łoblyk se hymda, galoty i westa, majtnoł sie na piyńcie i wyloz ze chałupy. Baba tyż sie blank nazod prziłodzioła, wylazła przed chałupa, podciongła te jeji „silikony”, stanyła, jesce roz podciepła sie te „silikony” i medikuje:
– Wejrzicie sie ino ludzie. Jo ci na isto dalszij niy wiym, dalszij niy miarkuja co tyż tyn Bercik tak na richtik łodymie chcioł? A wy wiycie?
Ojgyn